綠葉王丨喬寶寶當年被媽媽棒打鴛鴦　感謝黑妹帶住走埠登台搵真銀

喬寶寶早年移民蘇格蘭後鮮有在港露面，日前返港探望老友，並現身新城廣播創作總監葉文輝（啤梨）主持的節目《卡啦
O！BABE》大展歌喉唱K，啤梨為迎合鬼馬喬寶寶，特別為對方設計了一張海報，搞笑地寫上「首個喬寶寶個人演唱會」，而旁邊有個QR Code，大家只要掃一掃個條碼便可以收聽喬寶寶的鬼馬歌聲。

印度裔的喬寶寶於香港出生，說得流利廣東話的他就連唱K亦字正腔圓，在節目上分別唱葉振棠的《勝利雙手創》、阿牛的《至冧情歌》，以及張國榮《不羈的風》及《Monica》。

他更將《Monica》其中一句歌詞改成「喬嫂嫂誰能代替你地位」狂冧愛妻，又將《勝利雙手創》的一句改為「勝利啤梨創」，令節目生色不少。

【恩愛夫妻】喬寶寶不適求醫遭老婆笑「無得救」　夫妻盲婚啞嫁牽手走過32年

▲ 喬寶寶

感謝黑妹帶走埠登台

喬寶寶在2005年因參加《殘酷一叮》而加入TVB，憑住邊搞笑邊唱廣東歌成功出位的他，入行後更得到契姐李麗霞（黑妹）帶挈四出登台搵真銀。

啤梨問他喜歡唱歌還是純粹搵食而唱？他稱：「其實我8成收入靠唱歌，但我唔識中文字，靠記歌詞，好彩《殘酷一叮》呢個節目，畀大家知道喬寶寶可以唱歌，同埋好多謝黑妹姐，我跟咗佢成個生肖，家姐帶住我周圍走埠。」啤梨表示：「你好好呀，好過好多歌手，其他歌手都未必有八成收入靠唱歌。」

另外，喬寶寶指自己熱愛中國文化，讀書時期亦與一個本地女仔拍拖，可惜最後遭母親棒打鴛鴦，說：「佢話阿仔，雖然我哋離鄉別井，但我哋一定要搵番自己人，我好聽阿媽話，接受唔到我老媽子每一滴眼淚。」

▲ 喬寶寶

返家鄉印度水土不服

後來喬寶寶母親介紹三位女士給他，分別是加拿大印度西施、英國印度西施及印度西施，他娓娓道來：「加拿大嗰位係千萬富婆，打跛腳都唔使憂嗰啲，但有個小朋友，我話我咁細個，唔使Buy one get one啦，等我自己嚟；第二個英國人係百萬富婆，但同你（啤梨）體重差唔多，不過年齡大我十年，我話第時帶出街話係我老婆定阿媽？恐怕洞房時會壓親我。」

至於第三個印度女孩則成為了現任「喬太」，喬寶寶指：「因為我都想了解多啲印度文化，我第一次返印度係4歲，第二次返去就結婚，嗰時係18歲半。」

怎料返家鄉籌備婚禮翌日，喬寶寶即遇上一次慘痛經歷，說：「因為我哋都鍾意成個土地，就試吓飲印度水，點知第2日水土不服，我頭一星期屙得好淒厲，第10日要結婚，好彩第7日就開始好返。」這次變成「瀉寶寶」令喬寶寶畢生難忘，他呼籲：「所以大家去印度最好飲蒸餾水或礦泉水。」

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5